Bu gün Bakıda “MiniBoss” Biznes Məktəbi tərəfindən növbəti startap biznes forumu təşkil olunub. Tədbir çərçivəsində ümumilikdə 20 layihə təqdim edilib.

“MiniBoss Business School Baku”nun təsisçisi Nərminə Həsənova Oxu.Az-a açıqlamasında bildirib ki, bu, artıq məktəbin 6-cı biznes forumudur və ümumilikdə son altı il ərzində 90-dan çox layihə reallaşdırılıb.

Onun sözlərinə görə, forumda təqdim olunan layihələr münsiflər heyəti tərəfindən qiymətləndiriləcək, ən yaxşı ideyalar isə sponsorlar tərəfindən qrantlarla dəstəklənəcək. Seçilən iştirakçılar daha sonra iyunun 13-də keçiriləcək milli çempionatda öz startaplarını – məhsul və xidmətlərini yenidən təqdim edəcəklər.

Növbəti mərhələ isə beynəlxalq səviyyədə baş tutacaq. N. Həsənova bildirib ki, iyulun 9-da İsveçrənin Davos şəhərində dünya çempionatı keçiriləcək.

“Azərbaycan bu istiqamətdə iki dəfə dünya çempionu olub. Eyni zamanda komandalarımız iki dəfə ikinci, iki dəfə isə üçüncü yerləri qazanıblar”, – deyə o qeyd edib.

Təsisçi əlavə edib ki, layihənin əsas məqsədi uşaqlarda erkən yaşlardan biznes düşüncəsini formalaşdırmaq və onların potensialını üzə çıxarmaqdır.