Sabirabad rayonunun Suqovuşan ərazisində Kür çayında suyun səviyyəsinin kəskin yüksəlməsi nəticəsində çay öz məcrasından çıxıb.

Realmedia.info xəbər verir ki, son günlər yağan intensiv yağışlar Kür çayında suyun həcmini artırıb. Nəticədə Kür və Araz çaylarının birləşdiyi əraziyə yaxın hissədə su sahilboyu yerləşən Tuğay meşələri istiqamətində yayılmağa başlayıb.
Məlumata görə, hadisənin baş verdiyi zonaya yaxın ərazidə restoranlar da yerləşir və suyun həmin istiqamətdə axını müşahidə olunur.

Sabirabad rayon Fövqəladə Hallar Komissiyasından bildirilib ki, vəziyyət tam nəzarət altındadır və hazırda ciddi təhlükə gözlənilmir. Qeyd olunub ki, suyun səviyyəsi mühafizə bəndindən təxminən iki metr aşağıda qalır.

Aidiyyəti qurumlar tərəfindən ərazidə davamlı monitorinqlər aparılır, vəziyyətin sabit saxlanılması üçün qabaqlayıcı tədbirlər görülür. Zərurət yaranacağı halda əlavə texnika və canlı qüvvənin cəlb ediləcəyi də bildirilib.