Ermənistanda keçirilən parlament seçkiləri zamanı saat 17:00-dək Daxili İşlər Nazirliyinin Operativ İdarəetmə Mərkəzinə 57 qanun pozuntusu ilə bağlı məlumat daxil olub.

Realmedia.info xəbər verir ki, bu barədə Ermənistan Daxili İşlər Nazirliyi məlumat yayıb.

Bildirilib ki, qeydə alınan pozuntular arasında 19 təkrar səsvermə cəhdi, 15 səsvermənin məxfiliyinin pozulması, iki seçki hüququnun həyata keçirilməsinə mane olma, bir seçki rüşvəti vermə və bir seçki məntəqəsində soyuq silah gəzdirmə faktı yer alıb.

Qeyd olunan hallarla bağlı materiallar ibtidai istintaq orqanına göndərilib. Hazırda 14 nəfər saxlanılıb.

Məlumata görə, ehtimal olunan digər qanun pozuntuları ilə bağlı 198 müraciət araşdırılır. Kütləvi informasiya vasitələrində və sosial şəbəkələrdə seçki prosesi ilə bağlı yayılan məlumatlar da yoxlanılır.

Ermənistan DİN-in Miqrasiya və Vətəndaşlıq Xidmətinin məlumatına əsasən, seçicilərin əlavə siyahılara daxil edilməsi üçün 1 650 nəfər müraciət edib.

Parlament seçkilərində iştirak etmək məqsədilə şəxsiyyəti təsdiq edən müvəqqəti sənəd (Forma №9) isə 916 vətəndaşa təqdim olunub.

Bundan başqa, seçkinin təşkili və keçirilməsi ilə bağlı xidmətin qaynar xəttinə 820 zəng daxil olub, 1 250 nəfərə isə ərazi bölmələrində və mobil ofislərdə məsləhət xidməti göstərilib.