Zimbabve hökuməti ölkədə malyariyanın sürətlə yayılması fonunda yeni tədbirlər planı hazırlayır.

Realmedia.info xəbər verir ki, bu barədə "The Herald" qəzeti məlumat yayıb.

Məlumata görə, 2026-cı ilin ilk aylarında ölkədə malyariyaya yoluxma halları ötən dövrlə müqayisədə dörd dəfə artaraq 65 minə çatıb.

Zimbabvenin səhiyyə naziri Duqlas Mombeşora bildirib ki, xəstəliyin bu qədər sürətlə yayılmasının səbəbləri təcili şəkildə araşdırılmalı və problemin qarşısının alınması üçün zəruri addımlar atılmalıdır.

Nazir qeyd edib ki, mövcud vəziyyət təkcə Zimbabveyə xas deyil və bir sıra ölkələrdə də oxşar problemlər müşahidə olunur. Onun sözlərinə görə, aidiyyəti qurumlar artıq yoluxma hallarının artmasının səbəblərini müəyyən etmək üçün araşdırmalara başlayıblar.

Hökumət nümayəndələri malyariya ilə mübarizənin gücləndirilməsi, profilaktik tədbirlərin genişləndirilməsi və əhalinin maarifləndirilməsi istiqamətində əlavə tədbirlərin görüləcəyini bildiriblər.