Bir vaxtlar universitet auditoriyalarına böyük arzularla daxil olan Həmidə və Nəzrin Sadıqova bacıları bu gün həmin arzularını daha böyük hədəflərlə davam etdirirlər. Onların uğur hekayəsi artıq beynəlxalq miqyasda yeni bir mərhələyə qədəm qoyur.

Realmedia.info xəbər verir ki, məktəb və universitet illərini birgə keçirən bacılar Böyük Britaniyanın nüfuzlu ali təhsil ocaqları – University of Oxford və University of Cambridge universitetlərinin magistratura proqramlarına qəbul olunublar.

Nəzrin Sadıqova hazırda Baku State University-nin Hüquq fakültəsinin IV kurs tələbəsidir. O, təhsilini Oksford Universitetində davam etdirəcək. Gənc tələbə seçdiyi ixtisasın həm məsuliyyətli, həm də şərəfli olduğunu vurğulayır:

“Hüquq sahəsini seçməyimin əsas səbəbi ədalətə olan inamımdır. Mən hüquq və maliyyə proqramına qəbul oldum. Çünki beynəlxalq iqtisadi hüquq sahəsinə xüsusi marağım var”.

Nəzrin bildirir ki, Oksford Universitetinə gedən yolun planını hələ üçüncü kursdan etibarən qurmağa başlayıb. Yüksək rəqabətə baxmayaraq, o, məqsədindən geri çəkilməyərək uğur qazanıb.

Digər bacı – Həmidə Sadıqova isə University of Cambridge-də Siyasət və Beynəlxalq Araşdırmalar proqramı üzrə təhsil alacaq. Birinci sinifdən etibarən eyni yolu addımlayan bacıların yolları ilk dəfə olaraq ayrılır. Onlar artıq fərqli şəhərlərdə, fərqli istiqamətlər üzrə yeni həyat mərhələsinə başlayacaqlar.

Qeyd edək ki, Sadıqova bacıları universitetə qəbul olduqları ilk gündən Prezident təqaüdçüsü adını qazanıblar və bu statusu illər ərzində uğurla qoruyublar.

Onların hekayəsi göstərir ki, düzgün planlama, zəhmət və məqsədyönlülük ən böyük arzuları belə gerçəyə çevirə bilər.