Realmedia.info xəbər verir ki, paytaxt Bakı şəhərində güclü yağışlardan sonra yaranan fəsadların aradan qaldırılması məqsədilə genişmiqyaslı təmizlik işləri həyata keçirilib.
Məlumata görə, bu barədə Bakı Şəhər İcra Hakimiyyəti məlumat yayıb.

Bildirilib ki, səhər saatlarından etibarən kommunal xidmətlərin texnikası tərəfindən şəhərin 555 əsas küçə, prospekt və məhəllədaxili yolları xüsusi yuyucu vasitələrlə yuyulub. Eyni zamanda səki kənarları, bordürlər, işıq dirəkləri, məhəccərlər, park və istirahət yerlərində oturacaqlar təmizlənib, həyət və yaşayış məhəllələrində səliqə-sahman işləri görülüb.

Həmçinin ictimai-iaşə və ticarət obyektlərinin vitrinləri yuyulub və ətraf ərazilərdə təmizlik işləri aparılıb.
Qeyd olunub ki, Bakı Şəhər Yaşıllaşdırma Təsərrüfatı Birliyi əməkdaşları ağac və yaşıllıqlara qulluq göstərib, üzərlərində toplanan toz-torpaq təmizlənib, zədələnmiş hissələr budanıb, yeni güllər əkilərək müxtəlif landşaft kompozisiyaları yaradılıb.

BŞİH-dən bildirilib ki, paytaxtın bütün rayonlarını əhatə edən bu tədbirlər yağışların fəsadlarının aradan qaldırılmasına və şəhərin sanitar vəziyyətinin yaxşılaşdırılmasına xidmət edir. İşlərin ilboyu davam etdiriləcəyi də vurğulanıb.