Masallı Rayon İcra Hakimiyyətinin inzibati binasının qarşısında təşkil olunmuş Novruz şənliyində el sənəti nümunələri, rayonda istehsal olunan məhsullar, milli mətbəximizin təamları və gənc rəssamların əsərlərindən ibarət sərgi nümayiş olunub.
Masallı Rayon İcra Hakimiyyətinin başçısı Araz Əhmədov, həmçinin, Dədə Qorqud Novruz və müqəddəs Ramazan bayramları münasibətilə rayon sakinlərini təbrik edib, masallılara xoş arzularını söyləyiblər. Sonra rayon rəhbəri şəhid övladları ilə birlikdə bayram tonqalını alovlandırıb. Novruzun rəmzləri olan Bahar qızın, Kosa və Keçəlin çıxışları alqışlarla qarşılanıb.

Azərbaycan Respublikası "Xocalı Soyqırımını Tanıtma" ictimai birliyi Masallı Dövlət Regional Kolleci ilə birgə N.Gəncəvi adına Mədəniyyət Mərkəzində Novruz şənliyi keçirib.
Kollecin direktoru, filologiya üzrə fəlsəfə doktoru Rövşən Qurbanov, Yeni Azərbaycan Partiyası Masallı rayon təşkilatının sədri Seyfəddin Əliyev, "Xocalı Soyqırımını Tanıtma" ictimai birliyinin sədri, tanınmış jurnalist Şamil Sabiroğlu, iki şəhidin anası Ziba Əsgərova, "Vətənpərvərlər" Maarifləndirmə ictimai birliyinin həmtəsisçisi, müharibə veteranı Çingiz Bayramov, yazıçı - publisist Mövsümağa Abasov və başqaları Novruz ənənələrindən, milli mənəvi dəyərlərimizin qorunub saxlanılması və gələcək nəsillərə ötürülməsinin əhəmiyyətindən danışıblar. Tələbələrin ifasında mahnılar səslənib, rəqslər və ədəbi-bədii kompozisiya nümayiş olunub.
Novruz bayramı ilə əlaqədar keçirilən müsabiqənin qaliblərinə Təşəkkürnamə və diplomlar təqdim olunub.

Şamilə Şamil qızı, jurnalist.
21.03.2026.