Türkiyənin Şanlıurfa vilayətinin Siverek rayonu ərazisində yerləşən Ahmet Koyuncu Peşə və Texniki Anadolu Liseyində baş verən silahlı hücumla bağlı saxlanılan şübhəli şəxslərin sayı 20-yə çatıb.

Realmedia.info xəbər verir ki, bu barədə TGRT Haber məlumat yayıb. Valilik tərəfindən verilən açıqlamada bildirilib ki, hücumun hər hansı qruplaşma ilə əlaqəsi müəyyən olunmayıb. Hadisənin fərdi zəmində baş verdiyi və terror və ya təşkilatlanmış cinayət xarakteri daşımadığı vurğulanıb.

Hadisə zamanı yaralananların vəziyyətinə də aydınlıq gətirilib. Şəhər xəstəxanalarında müalicə alan 9 nəfərdən 8-nin vəziyyətinin yaxşı olduğu, bir şagirdin isə vəziyyətinin kritik olaraq qaldığı bildirilib.

Digər tərəfdən, Kahramanmaraş və Şanlıurfada məktəblərə silahlı hücumlar fonunda rəqəmsal platformalarda cinayət xarakterli paylaşımlarla bağlı genişmiqyaslı əməliyyatlar aparılıb. Türkiyə Daxili İşlər Nazirliyi yanında Təhlükəsizlik Baş İdarəsinin məlumatına görə, saxlanılanlar arasında 6 azyaşlı da var.

Araşdırmalar çərçivəsində cinayətləri təşviq edən və ictimai asayişə mənfi təsir göstərən paylaşımlar edən 83 nəfər barəsində saxlanılma qərarı çıxarılıb. Bundan əlavə, 940 sosial media hesabına giriş bloklanıb, 93 “Telegram” qrupu bağlanılıb.

Qeyd edək ki, aprelin 14-də Siverek rayonunda liseydə baş verən silahlı insident nəticəsində 16 nəfər xəsarət alıb. Bir gün sonra isə Kahramanmaraşda məktəbli tərəfindən törədilən silahlı hücum zamanı bir müəllim və səkkiz şagird həyatını itirib.

Faktlarla bağlı araşdırmalar davam etdirilir.