Ukraynada xüsusi hərbi əməliyyat zonasına insanabənzər robotların ilk partiyası gətirilib.

Məlumata görə, ABŞ startapı tərəfindən hazırlanan “Phantom MK-1” robotları pilot layihə çərçivəsində Ukraynaya təhvil verilib. Hazırda bu robotlar təhlükəli ərazilərdə yüklərin toplanması və daşınması kimi logistik tapşırıqların yerinə yetirilməsi üçün sınaqdan keçirilir.

Bildirilir ki, “Phantom MK-1” modeli hələ məhdud funksionallığa malikdir. Robotun yükdaşıma qabiliyyəti 20 kiloqram təşkil edir, batareya ehtiyatı məhduddur və sudan qorunma sistemi mövcud deyil.

Şirkət bu ilin sonuna qədər texniki göstəriciləri əhəmiyyətli dərəcədə təkmilləşdirilmiş “Phantom 2” modelini təqdim etməyi planlaşdırır.

Qeyd olunur ki, bu addım Ukraynanın müasir hərbi texnologiyaların hazırlanması və tətbiqi istiqamətində fəaliyyətini gücləndirdiyi dövrə təsadüf edir. Daha əvvəl ölkənin Müdafiə Nazirliyinin yeni nəsil idarəolunan aviasiya bombalarının partiyasını əldə etdiyi də bildirilmişdi.