İranda baş vermiş hadisələr zamanı ölənlərin sayı ilə bağlı səsləndirilən iddialara rəsmi reaksiya verilib. İran rəsmisi Məsud Pezeşkian ABŞ tərəfindən irəli sürülən 32 min nəfərin öldürülməsi barədə açıqlamaya münasibət bildirib.
Onun sözlərinə görə, rəsmi qurumlar hadisələr zamanı həlak olan şəxslərin adlarını milli şəxsiyyət vəsiqəsi nömrələri ilə birlikdə ictimaiyyətə təqdim edib.

“Biz artıq həlak olanların adlarını milli şəxsiyyət vəsiqəsi nömrələri ilə birlikdə yayımlamışıq. Əgər kiminsə əlində başqa adlar varsa, onları sübutlarla birlikdə təqdim etsin”, – deyə Pezeşkian vurğulayıb.

O, həmçinin bildirib ki, hadisələr zamanı bəzi qüvvələr hakimiyyət dəyişikliyinə cəhd göstərib və zorakılıq halları qeydə alınıb. Pezeşkian məscidlərin yandırılması və təhlükəsizlik qüvvələrinə qarşı hücumların “etiraz” anlayışı ilə uyğun gəlmədiyini qeyd edib.

“Hadisələr zamanı bəzi qüvvələr hakimiyyəti dəyişməyə cəhd göstərirdi. Məscidləri yandıran və təhlükəsizlik qüvvələrini qətlə yetirən şəxslər ‘etirazçı’ hesab oluna bilməz. Etiraz edən insan məktəbi dağıdarmı? Etiraz edən insan məscidi yandırarmı?” – deyə o əlavə edib.

Xatırladaq ki, Donald Trump İran hakimiyyətini aksiyalar zamanı 32 min insanın öldürülməsində ittiham edib. Rəsmi Tehran isə bu iddianı əsassız adlandırır.