İranda keçirilən etiraz aksiyalarına təhlükəsizlik qüvvələrinin sərt müdaxiləsi nəticəsində ölənlərin sayı 2 615 nəfərə yüksəlib, 18 470 nəfər isə saxlanılaraq həbs edilib.
Realmedia.info xəbər verir ki, bu barədə “Human Rights Activist News Agency” (HRANA) təşkilatının etiraz aksiyalarının 18-ci gününün yekunlarına dair yaydığı hesabatda məlumat yer alıb.
Hesabatda bildirilir ki, həlak olanlar arasında 13 uşaq və 14 etirazlarda iştirak etməyən mülki şəxs var. Məlumata əsasən, etirazlar zamanı 153 təhlükəsizlik qüvvəsi əməkdaşı da həyatını itirib. Bundan əlavə, 882 ölüm faktı ilə bağlı araşdırmaların davam etdiyi qeyd olunub.
HRANA-nın məlumatına görə, yanvarın 14-də ölkə üzrə 31 vilayətin 187 şəhərində ümumilikdə 617 etiraz aksiyası qeydə alınıb.
Qeyd edək ki, İranda kütləvi etirazlar dekabrın 28-də milli valyutanın qəfil və kəskin dəyər itirməsindən sonra başlayıb. Etirazçılar əsasən iqtisadi vəziyyətin pisləşməsi, sosial problemlər və hökumətin siyasətinə etiraz edirlər.