Kolumbiya Prezidenti Qustavo Petro ABŞ rəsmilərinin son açıqlamalarına sərt reaksiya verib. O, mümkün təzyiq və ya saxlanılma ilə bağlı yayılan iddialara münasibət bildirərək bildirib ki, belə bir addım Kolumbiya xalqının ciddi etirazına səbəb olacaq.

Prezident Petro qeyd edib ki, o, demokratik yolla seçilmiş dövlət başçısıdır və ölkəsinin suverenliyinə yönəlmiş hər hansı müdaxilə qəbuledilməzdir. “Əgər məni tutmaq kimi bir addım atılsa, bu, təkcə mənə deyil, Kolumbiya xalqının iradəsinə qarşı yönəlmiş addım olacaq və xalqın qəzəbi ilə üzləşəcəklər”, – deyə o vurğulayıb.

Qustavo Petro əlavə edib ki, Kolumbiya ABŞ ilə münasibətlərin qarşılıqlı hörmət və bərabərlik prinsipləri əsasında qurulmasının tərəfdarıdır. Onun sözlərinə görə, təhdid və təzyiq dili regionda gərginliyi daha da artırmaqdan başqa heç bir nəticə verməyəcək.

Qeyd edək ki, son günlər ABŞ rəsmilərinin Kolumbiya və regionla bağlı sərt açıqlamaları beynəlxalq ictimaiyyətdə müzakirələrə səbəb olub.