Azərbaycan Respublikasının Prezidenti İlham Əliyev və Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan Əbu-Dabidə keçirilən “Sülh Qalxanı – 2026” Azərbaycan–BƏƏ birgə əməliyyat-taktiki hərbi təlimini izləyiblər.

Realmedia xəbər verir ki, təlimlər Azərbaycan və BƏƏ Silahlı Qüvvələrinin hərbi qulluqçularının iştirakı ilə təşkil olunub. Birgə hərbi məşqlər çərçivəsində müasir döyüş şəraitinə uyğun taktiki tapşırıqlar icra edilib, qoşunların koordinasiyası və qarşılıqlı fəaliyyət imkanları sınaqdan keçirilib.

Təlimin əsas məqsədi iki ölkə arasında hərbi əməkdaşlığın genişləndirilməsi, operativ uyğunluğun artırılması və şəxsi heyətin döyüş hazırlığının yüksəldilməsidir.

Müşahidə zamanı Prezident İlham Əliyev və Şeyx Məhəmməd bin Zayed Al Nəhyan birgə təlimlərin Azərbaycan–BƏƏ münasibətlərinin inkişafına mühüm töhfə verdiyini qeyd ediblər.

Qeyd edək ki, “Sülh Qalxanı – 2026” təlimi Azərbaycan ilə Birləşmiş Ərəb Əmirlikləri arasında strateji tərəfdaşlığın güclənməsinin və müdafiə sahəsində əlaqələrin dərinləşməsinin göstəricisi kimi qiymətləndirilir.