🇦🇿 Azərbaycan xalq tətbiqi sənətinin inkişafında mühüm rol oynamış görkəmli xalça rəssamı Lətif Kərimovun 120 illiyi qeyd olunacaq.

Realmedia.info xəbər verir ki, bununla bağlı Azərbaycan Respublikasının Prezidenti İlham Əliyev sərəncam imzalayıb.

Qeyd edək ki, 2026-cı ilin noyabr ayında SSRİ Dövlət mükafatı laureatı, Xalq rəssamı, görkəmli xalçaşünas, pedaqoq və sənətşünas alim Lətif Hüseyn oğlu Kərimovun anadan olmasının 120 illiyi tamam olur.

Lətif Kərimov Azərbaycan xalça sənətinin dünya miqyasında tanıdılmasında mühüm rol oynayıb. Onun eskizləri əsasında toxunmuş süjetli və portret xalçalar, həmçinin monumental xalılar milli xalçaçılıq ənənələrinin ən parlaq nümunələri hesab olunur.

Sənətkarın yaratdığı əsərlər dərin kolorit, zəngin naxışlar və bitkin üslubu ilə seçilərək ona geniş şöhrət qazandırıb. O, Azərbaycan xalçalarının ornamental və kompozisiya xüsusiyyətlərini sistemləşdirərək bu sahədə elmi təsnifatın əsasını qoyub.

Lətif Kərimovun xalça sənəti üzrə apardığı fundamental tədqiqatlar bu gün də beynəlxalq səviyyədə ən mötəbər mənbələrdən biri kimi qəbul olunur və sənət irsinin qorunub saxlanılmasına mühüm töhfə verir.