Azərbaycanda enerji təhlükəsizliyinin gücləndirilməsi və Naxçıvan Muxtar Respublikasının ölkənin vahid enerji sisteminə inteqrasiyası istiqamətində mühüm layihələrdən biri olan “Zəngəzur” elektrik ötürmə xəttinin tikintisinə start verilib.

Məlumata görə, layihə AzərEnerji ASC tərəfindən icra olunur. Xətt 330 kV gərginlikli, iki dövrəli olmaqla, yüksək ötürücülük qabiliyyətinə malikdir və 1000 MVt güc ötürmək imkanına sahib olacaq.

Layihə çərçivəsində elektrik ötürmə xətti Cəbrayıl rayonundan Ağbənd qəsəbəsinədək uzanacaq. Paralel olaraq Naxçıvan istiqamətində də tikinti işləri aparılır. Xəttin dağlıq və çətin relyefə malik ərazilərdən keçməsi tikinti prosesində mürəkkəb mühəndis həllərinin tətbiqini zəruri edir.

Bununla yanaşı, Naxçıvan şəhərində yeni 330 kV-luq yarımstansiyanın inşası da nəzərdə tutulur. Layihənin növbəti mərhələsində xəttin Zəngəzur dəhlizi vasitəsilə Türkiyəyə qədər uzadılması planlaşdırılır.

Qeyd edək ki, “Zəngəzur” elektrik ötürmə xətti Naxçıvanın elektrik enerjisi təminatında xarici asılılığın azalmasına, eləcə də Azərbaycanın regional və beynəlxalq enerji layihələrində mövqeyinin möhkəmlənməsinə xidmət edəcək.