"Qarabağ" futbol klubunun baş məşqçisi Qurban Qurbanov Elvin Cəfərquliyevin əsas komandadan uzaqlaşdırılması ilə bağlı məsələyə münasibət bildirib.

O, “Sabah”la oyundan sonra keçirilən mətbuat konfransında futbolçuların inkişafının hər zaman onun üçün prioritet olduğunu deyib:

“İstənilən futbolçunun arxasındayam. Bu günə qədər olmayıb ki, hansısa futbolçunun inkişafını, yaşam tərzini və gələcəyini düşünməyim. Hətta ən zəif oynayan futbolçunun belə gələcəyini düşünmüşəm və onunla söhbət etmişəm”, – deyə Q.Qurbanov bildirib.

Baş məşqçi qeyd edib ki, klubun prinsipləri hər bir futbolçu üçün eynidir və intizam məsələlərinə xüsusi həssaslıqla yanaşılır:

“Bu, ‘Qarabağ’ klubudur. Burada stabil olmaq vacibdir. Çempionlar Liqasında uğur qazansan belə, bu, intizamsızlığa göz yummaq üçün əsas deyil. Klubun adıdır ‘Qarabağ’ və buna görə müəyyən qaydalar var”, – deyə o əlavə edib.

Qurban Qurbanov həmçinin vurğulayıb ki, klubdaxili qərarlar komandanın ümumi maraqları nəzərə alınaraq verilir və futbolçuların məsuliyyəti daim yüksək olmalıdır.