“Hər sualın cavabını bilsəydim, yəqin ki, futbolda ən ağıllı insanlardan biri olardım. Düşünmədiyimiz şeyi bu gün yaşadıq. İkinci hissədə rəqib 10 nəfər qalmışdı. İki dəqiqədə iki qol buraxmağımızın səbəbini dərin təhlil edərək tapmalıyıq”.

Bu sözləri “Sabah”ın baş məşqçisi Valdas Dambrauskas Bizon Azərbaycan Kubokunun 1/4 final mərhələsinin cavab oyununda “Qəbələ”ni penaltilər seriyasında məğlub edərək yarımfinala yüksəldikləri matçdan sonra keçirilən mətbuat konfransında deyib.

O, həm rəqib komandaya, həm də öz oyunçularına göstərdikləri mübarizəyə görə təşəkkürünü bildirib: “Hər iki komandanı da göstərdikləri mübarizəyə görə təbrik edirəm. ‘Qəbələ’ çox böyük mübarizlik göstərdi. Öz komandamı isə yarımfinala yüksəldikləri üçün təbrik edirəm. Rəqib 10 nəfərlə qaldıqdan sonra geridönüş etdi. Oturub bunun səbəbini tapmalıyıq. Qələbədən bizi çox incə xətt ayırdı. Neytral azarkeşlər də yəqin ki, bu oyundan həzz aldı”.
Baş məşqçi həmçinin çempionat və kubokdakı mövqelər barədə danışaraq qeyd edib ki, indi əsas məqsəd oyunçuların bərpasıdır və qarşıdan gələn matçlara hazırlaşmaqdır: “Deyə bilərəm ki, ‘Qarabağ’la oyun barədə düşünmürəm. Heç finalla bağlı da fikirləşmirəm. Heç yarımfinalın günləri də bəlli deyil. Biz qarşıdakı çempionat oyunlarına hazırlaşmalıyıq. Futbolda belə şeylər olur. ‘Sabah’ azarkeşlərini təbrik edirəm. Bu dəli dünyada başımıza nələrin gələcəyini bilmək olmaz. Qarşıda çətin oyunlarımız var. Biz davam etməliyik. Son iki oyun böyük dərsdir. Düşündüyüm sadəcə oyunçularımın bərpasıdır”.