Səhiyyə Nazirliyinin K.Fərəcova adına Elmi-Tədqiqat Pediatriya İnstitutunun baş həkimi vəzifəsində çalışan Gündüz Ağayev tutduğu vəzifədən azad olunub.

Məlumata görə, səhiyyə naziri Teymur Musayev tərəfindən imzalanmış müvafiq əmr əsasında tibb üzrə fəlsəfə doktoru, Əməkdar həkim və Rusiya Uşaq Cərrahları Assosiasiyasının üzvü olan Gündüz Ağayev öz ərizəsi ilə işdən ayrılıb.

Məsələ ilə bağlı məlumat Azərbaycan Respublikası Səhiyyə Nazirliyinin Media və Kommunikasiya şöbəsi tərəfindən təsdiqlənib. Bildirilib ki, qərar onun şəxsi müraciəti əsasında rəsmiləşdirilib.

Qeyd edək ki, Gündüz Ağayev uzun illər K.Fərəcova adına Elmi-Tədqiqat Pediatriya İnstitutunda Erkən yaşlı uşaqların cərrahiyyəsi şöbəsinin müdiri və Respublikanın Baş Uşaq Cərrahı vəzifələrində çalışıb. Onun pediatrik cərrahiyyə sahəsində ölkə səhiyyəsinə mühüm töhfələr verdiyi vurğulanır.