Akademik avarçəkmə, kayak və kanoe üzrə “Prezident Kuboku-2026” beynəlxalq turnirinin açılış mərasimi keçirilib.

Realmedia.info xəbər verir ki, Mingəçevirdə baş tutan tədbirdə bir sıra rəsmi şəxslər və idman ictimaiyyətinin nümayəndələri iştirak ediblər.

Tədbirdə çıxış edən Mingəçevir şəhər icra başçısı İlham İsmayılov yarışın əhəmiyyətini vurğulayaraq iştirakçılara uğurlar arzulayıb. O bildirib ki, yarış artıq böyük maraq doğurub və ötən gün Sərsəng su anbarında start götürən mübarizələr idmansevərlər tərəfindən diqqətlə izlənilib.

Mərkəzi Aran Regional Gənclər və İdman İdarəsinin rəisi Azad Gözəlov isə turnirin vacibliyini və idmanın cəmiyyət üçün önəmini qeyd edib. O vurğulayıb ki, bu gün Azərbaycanda yetişən idmançılar gələcəkdə ölkənin bayrağını daha yüksəklərə qaldıracaqlar.

Azərbaycan Su İdman Növləri Federasiyasının icraçı vitse-prezidenti Fərhad Əliyev də çıxışında bu cür yarışların yeni istedadların üzə çıxarılmasında mühüm rol oynadığını bildirib.

Daha sonra ümummilli lider Heydər Əliyev və akademik Zərifə Əliyevaya həsr olunmuş videoçarx nümayiş etdirilib.

Tədbir bədii proqramla davam edib.

Qeyd edək ki, yarışda Azərbaycanla yanaşı Çexiya, Gürcüstan, Almaniya, Yunanıstan, Qazaxıstan, Qırğızıstan, Litva, Moldova, Rumıniya, Serbiya, İsveç, Tacikistan, Türkiyə, Ukrayna və Özbəkistandan 100-dən artıq idmançı iştirak edir.

Turnirə ötən gün Ağdərənin Sərsəng su anbarında start verilib və reqata mayın 1-də başa çatacaq.