Bakıda 286 nömrəli tam orta ümumtəhsil məktəbində ciddi insident baş verib. IX sinif şagirdləri arasında yaranan mübahisə nəticəsində 2010-cu il təvəllüdlü məktəbli sinif yoldaşına xəsarət yetirib.

İlkin məlumata görə, hadisə zamanı 2011-ci il təvəllüdlü şagirdin üzərinə spirt tökülərək alışqanla od vurulub. Nəticədə yeniyetmə ağır yanıq xəsarətləri alıb.

TƏBİB-in məlumatına əsasən, zərərçəkən dərhal Respublika Təcili və Təxirəsalınmaz Tibbi Yardım Mərkəzinə çatdırılıb və Nərimanov Tibb Mərkəzinin Yanıq Mərkəzinə yerləşdirilib. Ona baş, üz, boyun, gövdənin ön və yan səthləri, həmçinin hər iki yuxarı ətraf üzrə II–III dərəcəli termiki yanıq diaqnozu qoyulub.

Hazırda yeniyetmənin vəziyyəti ağır qiymətləndirilir və müalicəsi reanimasiya şöbəsində davam etdirilir.
Bakı Şəhəri üzrə Təhsil İdarəsi hadisə ilə bağlı məlumat yayaraq bildirib ki, məktəb rəhbərliyi tərəfindən dərhal təcili tibbi yardım çağırılıb, şagirdə ilkin yardım göstərilib və aidiyyəti qurumlara məlumat verilib. Eyni zamanda məktəbdə psixoloji dəstək tədbirlərinə başlanılıb, şagird və müəllimlərlə söhbətlər aparılır.

Hadisəni törətməkdə şübhəli bilinən yeniyetmə polis əməkdaşları tərəfindən saxlanılıb. Faktla bağlı araşdırma aparılır.