Bir müddət əvvəl vətəndaşa saxta sağlamlıq arayışının verilməsi ilə gündəmə gələn "General Hospital" özəl tibb müəssisəsində aparılan araşdırmalar zamanı qanun pozuntusu aşkarlanıb.

Səhiyyə Nazirliyinin Analitik Ekspertiza Mərkəzinin (AEM) məlumatına görə, cari ilin may ayında Bakı şəhərinin Suraxanı rayonu, Qaraçuxur qəsəbəsində yerləşən "SEYMUR-M" MMC-yə məxsus "General Hospital"da plandankənar yoxlama keçirilib.

Yoxlama zamanı müəssisədə lisenziya olmadan cari praktik özəl tibb fəaliyyəti göstərilməsi faktı müəyyən edilib. Aşkarlanan inzibati xəta ilə bağlı İnzibati Xətalar Məcəlləsinin 210.1-ci maddəsinə əsasən protokol tərtib olunaraq aidiyyəti üzrə növbəti icraata göndərilib.

Qanunvericiliyə əsasən, lisenziyasız özəl tibb fəaliyyəti ilə məşğul olan fiziki şəxslər 2 min manatdan 3 min manatadək, vəzifəli şəxslər 5 min manatdan 10 min manatadək, hüquqi şəxslər isə 20 min manatdan 30 min manatadək məbləğdə cərimə oluna bilərlər.

Qeyd edək ki, sözügedən tibb müəssisəsi vətəndaşa saxta sağlamlıq arayışı verilməsi ilə bağlı yayılan xəbərlərdən sonra ictimai müzakirələrin mərkəzinə düşmüşdü.