Bakıda keçirilən Ümumdünya Şəhərsalma Forumu 13-cü Sessiyası “Bakı Fəaliyyətə Çağırış” adlı yekun sənədlə başa çatacaq.

Bildirilib ki, sənəd inklüziv, dayanıqlı və davamlı şəhərlərin formalaşdırılması istiqamətində ortaq baxışı və kollektiv öhdəliyi özündə əks etdirəcək.

Qeyd olunub ki, sənədin əsas məqsədi şəhərsalma sahəsində qlobal əməkdaşlığı gücləndirmək, urbanizasiya ilə bağlı çağırışlara qarşı birgə fəaliyyət mexanizmlərini təşviq etməkdir.

“Hazır həll yolları mövcuddur. İndi əsas tələb olunan məsələ kollektiv qətiyyətdir ki, inklüziv, dayanıqlı və davamlı şəhərlər vədi hər kəs üçün reallığa çevrilsin”, – deyə vurğulanıb.

Qeyd edək ki, Bakı şəhərində keçirilən forum dünyanın müxtəlif ölkələrindən minlərlə nümayəndəni bir araya gətirib və tədbirdə şəhərsalma, iqlim dəyişiklikləri, urbanizasiya və davamlı inkişaf məsələləri müzakirə olunur.