Ümumdünya Şəhərsalma Forumunun 13-cü sessiyası (WUF13) qlobal böhranlar və iqtisadi çətinliklər fonunda keçirilir.

Bu barədə BMT baş katibi António Guterres forumun rəsmi açılış mərasiminə ünvanladığı videomüraciətdə bildirib.
O qeyd edib ki, dünyada təxminən 3 milyard insan qeyri-adekvat yaşayış şəraitində yaşayır və bu, şəhərsalma sahəsində ciddi problemlərin mövcudluğunu göstərir.

BMT baş katibi vurğulayıb ki, inkişaf etməkdə olan ölkələr də daxil olmaqla, mənzil problemi və evsizlik təhlükəsi geniş yayılıb:

“Yaşayış şəraiti insan sağlamlığına birbaşa təsir edir. Buna görə də qeyri-rəsmi yaşayış məntəqələrinin və gecəqonduların transformasiyası, həmçinin sosial bərabərsizliyin azaldılması vacibdir.”

O əlavə edib ki, mənzil insan hüququdur və insan ləyaqətinin əsas əsasını təşkil edir.

Forum çərçivəsində WUF13 – Ümumdünya Şəhərsalma Forumu 13-cü sessiya şəhərsalma problemlərinin həlli, dayanıqlı inkişaf və qlobal əməkdaşlıq məsələlərini müzakirə edir.

BMT rəhbəri bildirib ki, bu forum dünyada hər kəs üçün daha əlverişli və təhlükəsiz yaşayış mühitinin yaradılmasına töhfə verə bilər.