Bu gün 31 Mart – Azərbaycanlıların Soyqırımı Günündən 108 il keçir.

1918-ci il martın 30-dan aprelin 3-dək Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə azərbaycanlılara qarşı kütləvi qırğınlar törədilib.

Realmedia.info xəbər verir ki, rəsmi mənbələrə əsasən, həmin hadisələr zamanı 12 minə yaxın azərbaycanlı qətlə yetirilib, on minlərlə insan isə itkin düşüb.

Tarixi faktlara görə, xüsusilə Quba ərazisində baş verən qətliamların izləri sonradan aşkarlanıb və bu faciənin miqyasını sübut edən kütləvi məzarlıqlar üzə çıxarılıb. Bu hadisələrin xatirəsini yaşatmaq məqsədilə Quba Soyqırımı Memorial Kompleksi yaradılıb.

31 Mart – Azərbaycanlıların Soyqırımı Günündə xalqımız faciə qurbanlarının xatirəsini dərin hörmət və ehtiramla yad edir.

Realmedia.info kollektivi olaraq bu faciənin bütün qurbanlarına Allahdan rəhmət diləyir, onların yaxınlarına dərin hüznlə başsağlığı veririk.