2026-cı ildə Azərbaycan vizasız səfər imkanlarına görə dünya pasport reytinqində 67-ci yerdə qərarlaşıb.
Bu barədə məlumat "Henley & Partners" tərəfindən hazırlanan reytinqdə açıqlanıb. 2025-ci illə müqayisədə Azərbaycan üç pillə irəliləyib və ölkə vətəndaşları artıq 70 vizasız istiqamətə səfər edə bilirlər.
Qonşu ölkələr arasında Ermənistan 71-ci, Gürcüstan 42-ci, İran isə 92-ci yerdədir. Ermənistanın vətəndaşları 66, Gürcüstan 112, İran isə 40 ölkəyə vizasız səfər edə bilir.
Siyahının başında isə ardıcıl ikinci ildir ki, Sinqapur qərarlaşıb. Sinqapur vətəndaşları 192 ölkəyə vizasız səfər edə bilirlər. Reytinqin ilk onluğunda həmçinin Yaponiya, Cənubi Koreya, BƏƏ, AB ölkələrinin əksəriyyəti, Böyük Britaniya və ABŞ yer alıb.
Ən aşağı pillələrdə isə Əfqanıstan, Suriya, İraq, Yəmən, Pakistan və Somali qərarlaşıb. Əfqanıstan yalnız 24 vizasız istiqamətə malikdir.