Azərbaycan Respublikasının Prezidenti İlham Əliyev “Sülh və Barışıq üçün Gernika mükafatı”nın təqdimolunma mərasiminin iştirakçılarına müraciət ünvanlayıb.

Realmedia.info xəbər verir ki, bu barədə AZƏRTAC məlumat yayıb.

Dövlət başçısı müraciətində bildirib ki, Azərbaycan ilə Ermənistan arasında sülhün əldə olunması və dialoqun təşviqi istiqamətində göstərilən səylərə görə bu nüfuzlu mükafata layiq görülməsi onun üçün böyük şərəfdir. Prezident bu münasibətlə Gernika-Lumo və Pforshaym şəhər şuralarına, eləcə də mükafatın təşkilində iştirak edən qurumlara minnətdarlığını ifadə edib.

Müraciətdə qeyd olunub ki, 26 aprel – Gernika qurbanlarının anım günündə mükafatın təqdim edilməsi xüsusi rəmzi məna daşıyır. Prezident 89 il əvvəl baş vermiş Gernika bombardmanı zamanı dinc əhaliyə qarşı törədilən faciəni XX əsrin ən dəhşətli hadisələrindən biri kimi qiymətləndirib və qurbanların xatirəsini ehtiramla yad edib.

İlham Əliyev vurğulayıb ki, müharibələrin acı nəticələrini yaşamış xalqlar üçün sülh və barışıq anlayışı xüsusi əhəmiyyət daşıyır. O, Azərbaycanın da uzun illər münaqişə şəraitində yaşadığını xatırladaraq bildirib ki, ölkə hazırda sülh mühitinə uyğunlaşma mərhələsindədir.

Dövlət başçısı diqqətə çatdırıb ki, 2025-ci ilin avqustunda Vaşinqtonda keçirilmiş zirvə görüşündə Azərbaycan və Ermənistan arasında sülh sazişinin mətni paraflanıb və birgə bəyannamə imzalanıb. Bununla da uzun illər davam edən münaqişənin sona çatdığı və regionda yeni əməkdaşlıq mərhələsinin əsasının qoyulduğu qeyd olunub.

Prezident əlavə edib ki, artıq iki ölkə arasında etimad quruculuğu tədbirləri həyata keçirilir, iqtisadi və ticarət əlaqələrinin ilkin nəticələri müşahidə olunur. Onun sözlərinə görə, bu proseslər davamlı sülhün təmin olunmasına mühüm töhfə verir.

Sonda İlham Əliyev “Sülh və Barışıq üçün Gernika mükafatı”nın yalnız əldə edilmiş nailiyyətlərin tanınması deyil, həm də gələcək fəaliyyət üçün məsuliyyət və stimul olduğunu vurğulayaraq, tədbir iştirakçılarına uğurlar arzulayıb.