Prezident Kitabxanası Azərbaycanın görkəmli oftalmoloq-alimi, akademik və ictimai xadim Zərifə Əliyevanin həyat və fəaliyyətinə həsr olunmuş “Zərifə Əliyeva” adlı çoxdilli virtual kitab sərgisi hazırlayıb.

Kitabxanadan verilən məlumata görə, sərgidə akademikin zəngin elmi-pedaqoji irsi, oftalmologiya elminin inkişafına verdiyi mühüm töhfələr, ictimai fəaliyyəti və vətənə bağlılıqla keçən ömür yolu geniş şəkildə əks olunub.

Virtual sərgidə müxtəlif dillərdə nəşr edilmiş kitablar, elmi əsərlər və bioqrafik materiallar yer alır. Bu materiallar vasitəsilə Zərifə Əliyevanin oftalmologiya sahəsində apardığı fundamental tədqiqatlar, elmi nailiyyətləri, humanist dəyərlərə sədaqəti və uzun illər davam edən pedaqoji fəaliyyəti geniş şəkildə təqdim olunur.

Eyni zamanda sərgidə alimə həsr olunmuş xatirə-oçerklər, publisistik yazılar və tədqiqat işləri də nümayiş etdirilir. Bu materiallar onun yalnız görkəmli alim deyil, həm də yüksək mənəvi keyfiyyətlərə malik ziyalı obrazını əks etdirir.

Qeyd edək ki, virtual sərgi Prezident Kitabxanasının rəsmi internet saytı vasitəsilə ictimaiyyət üçün açıqdır və geniş oxucu auditoriyası üçün mühüm elmi-informasiya mənbəyi rolunu oynayır.

Sərgi ilə aşağıdakı link vasitəsilə tanış olmaq mümkündür:

My Webpage