Bu gün 1985-ci il yanvarın 7-də Şəmkir rayonunun Qılıncbəyli kəndində anadan olmuş Rəşad Atakişiyevin doğum günüdür. O, ailədə üç qardaşdan biri olub və həyatı boyu öz təlim-tərbiyəsi, bacarığı və fədakarlığı ilə seçilib.
Rəşad Atakişiyev 2002-ci ildə Azərbaycan Ali Hərbi Təyyarəçilik Məktəbinə daxil olaraq 2006-cı ildə “Uçuş Mühəndisi” ixtisasına yiyələnmiş və pilot kimi fəaliyyətə başlayaraq polkovnik-leytenant rütbəsinə yüksəlmişdir. Həm Azərbaycan, həm də Türkiyə Hərbi Hava Qüvvələrinin birgə təlimlərində iştirak edən Rəşad, “Şahinlər” filmində havada ən çətin manevrləri uğurla icra etmişdir.
2019-cu il iyulun 24-də keçirilən gecə təlim-məşq uçuşu zamanı MiQ-29 təyyarəsi Xəzər dənizinə düşüb və Rəşad Atakişiyev qəhrəmancasına şəhid olub. Onun nəşi avqust ayında tapılıb və ikinci Fəxri xiyabanda dəfn edilmişdir. 07 may 2021-ci ildə ona Şəhid statusu verilmişdir.
Rəşad Atakişiyev iki övlad atası və politoloq Qabil Hüseynlinin kürəkəni idi. Onun xatirəsi Azərbaycan xalqı tərəfindən daim ehtiramla yad edilir.