Qarabağ FK-ın qapıçısı Mateuş Koxalski İngiltərə mətbuatına maraqlı açıqlama verib.

Realmedia.info xəbər verir ki, 24 yaşlı qolkiper UEFA Çempionlar Liqasının pley-off mərhələsində Newcastle United-a 2:3 hesabı ilə məğlub olduqları oyundan sonra The Sun nəşrinə danışıb.

Polşalı qapıçı İngiltərədə çıxış etməyin ən böyük arzusu olduğunu bildirib:

“Mənim ən böyük arzum İngiltərədə oynamaqdır. Ümid edirəm ki, Premyer Liqa və Çempionşip klublarının skautları məni izləyib. Onların transferim üçün addım atacaqlarına inanıram”.

Koxalski xüsusilə İngiltərə futbolunun tempini və rəqabətini yüksək qiymətləndirdiyini vurğulayıb.

Qeyd edək ki, Mateuş Koxalski bu mövsüm UEFA Çempionlar Liqasında ən çox qurtarış edən üçüncü qapıçıdır. O, turnir çərçivəsində 45 seyv etməklə diqqətləri üzərinə çəkib.

Onun bu statistikası artıq bir sıra Avropa klublarının marağına səbəb olub. İngiltərə mətbuatına verdiyi açıqlama isə futbolçunun gələcək planlarının hansı istiqamətdə olduğunu açıq şəkildə göstərir.