Bakının Xətai rayonunda yolun bir hissəsində çökmə qeydə alınıb.

Realmedia.info xəbər verir ki, hadisə Xətai rayonu, Kənd Əhmədli qəsəbəsi, Elşən Süleymanov küçəsində baş verib.
Məlumata görə, ərazi hazırda təhlükəsizlik məqsədilə lentlə əhatəyə alınıb. Sakinlərin sözlərinə əsasən, minik avtomobili küçədən keçdikdən sonra yolun bir hissəsi qəfil çöküb.

Bildirilib ki, son günlər yağan intensiv yağışlardan sonra küçənin müxtəlif hissələrində asfalt örtüyündə çökmələr müşahidə olunub. Yerli sakinlər gecə saatlarında bu vəziyyətin piyadalar və sürücülər üçün ciddi təhlükə yarada biləcəyini qeyd edirlər.

Məsələ ilə bağlı İri Şəhərlərin Birləşmiş Su Təchizatı Xidmətindən problemin nə vaxt aradan qaldırılacağı barədə rəsmi açıqlama almaq mümkün olmayıb.

Sakinlər isə yaranmış problemin qısa müddətdə həll ediləcəyinə və daha ciddi fəsadların qarşısının alınacağına ümid etdiklərini bildiriblər.