Belə ki, Fövqəladə Hallar Nazirliyi (FHN) tərəfindən verilən məlumata görə, hadisə Xətai rayonu, Gəncə prospekti 29/35 ünvanında baş verib. Qurumdan bildirilib ki, sürüşmə ilə əlaqədar FHN-in Tikintidə Təhlükəsizliyə Nəzarət Dövlət Agentliyinin “Azkommunalayihə” institutu və Xətai Rayon İcra Hakimiyyəti nümayəndələri əraziyə baxış keçiriblər.
Təhlükəsizlik məqsədilə hadisə baş verən ərazi xüsusi lentlə əhatəyə alınıb.

Məsələ ilə bağlı açıqlama verən Geoloji Kəşfiyyat Agentliyinin İdarə Heyətinin sədri Əli Əliyev bildirib ki, son günlər Abşeron yarımadası ərazisində müşahidə olunan intensiv yağıntılar nəticəsində sərt yamacda səthi yuyulma baş verib. Bu isə sürüşməyə səbəb olub.

Onun sözlərinə görə, səhər saatlarında təxminən 3–4 kubmetr həcmində süxur kütləsi islanaraq yamac boyunca hərəkət edib:

“Proses lokal xarakter daşıyır. Əsas səbəb nisbətən yumşaq süxurların yağış suları nəticəsində yuyulması və islanmasıdır”.

Hazırda ərazidə FHN və Ekologiya və Təbii Sərvətlər Nazirliyi mütəxəssisləri tərəfindən araşdırmalar davam etdirilir.