Bəzən bir həkimin diqqəti yalnız tibbi xidmətlə məhdudlaşmır – o diqqət ailəyə ümid, valideynə güvən, uşağa isə sağlam gələcək bəxş edir. Şirvan Şəhər Mərkəzi Xəstəxanasının uşaq həkimi Aynurə xanım haqqında redaksiyamıza daxil olan müraciət də məhz belə bir nümunəni əks etdirir.
Redaksiyamıza anonim olaraq yazan bir xanım qeyd edir ki, övladı uzun müddət müxtəlif müalicələr alsa da, səhhətində arzu olunan nəticə əldə olunmurdu. Ümidlərin azaldığı bir vaxtda Aynurə xanıma müraciət ediblər. Qısa müddət ərzində qoyulan düzgün diaqnoz, təyin edilən effektiv müalicə və həkimin xüsusi diqqəti nəticəsində uşaq bu gün özünü tam sağlam hiss edir.
Müraciət müəllifi bildirir ki, bu nəticə təkcə tibbi biliklə bağlı deyil. Onun sözlərinə görə, Aynurə xanım hər bir uşağa böyük qayğı ilə yanaşır, valideynlərin narahatlığını diqqətlə dinləyir və hər bir detalı nəzərdən qaçırmır. Bu münasibət ailəyə həm tibbi, həm də mənəvi dəstək verir.
Anonim xanım xüsusilə vurğulayır ki, həkimin fəaliyyəti səmimiyyət və vicdan üzərində qurulub. Maddi imkanı zəif olan ailələrə də eyni həssaslıqla yanaşdığı, bəzi hallarda isə ehtiyac duyulan dərmanların təminində şəxsi dəstək göstərdiyi qeyd olunur. Bu isə əsl həkim məsuliyyətinin və insanlığının göstəricisi kimi dəyərləndirilir.
Belə həkimlər səhiyyə sistemimizin ən dəyərli simalarındandır. Onların əməyi yalnız bir pasiyentin sağalması ilə ölçülmür – onlar ailələrə ümid verir, cəmiyyətdə həkim adına olan inamı gücləndirirlər.
Redaksiyamıza müraciət edən xanım sonda Aynurə xanıma dərin təşəkkürünü bildirərək qeyd edir ki, belə həkimlərin fəaliyyəti daha geniş ictimaiyyətə çatdırılmalı və layiqincə qiymətləndirilməlidir.