Bakıda keçiriləcək BMT-nin Dünya Şəhərsalma Forumunun 13-cü sessiyası (WUF13) ilə əlaqədar Heydər Əliyev Beynəlxalq Aeroportu 15–25 may tarixlərində gücləndirilmiş əməliyyat rejimində fəaliyyət göstərəcək.
Bu barədə aeroportun mətbuat xidmətindən məlumat verilib.

Bildirilib ki, forum müddətində ölkəyə gələcək çoxsaylı beynəlxalq nümayəndə heyətləri və sərnişin axınının artması nəzərə alınaraq hava limanında əməliyyat prosesləri, sərnişin xidmətləri və təhlükəsizlik tədbirləri üzrə əlavə koordinasiya mexanizmləri tətbiq olunub. Məqsəd sərnişinlərin rahat, təhlükəsiz və fasiləsiz şəkildə hərəkətini təmin etməkdir.

Xüsusi nəqliyyat sistemi işə salınıb
WUF13 çərçivəsində hava limanı şəhərdaxili nəqliyyat sisteminə inteqrasiya olunaraq xüsusi marşrutlarla xidmət göstərəcək. Sərnişinlər hava limanı, əsas nəqliyyat qovşaqları, otellər və tədbir məkanları arasında fasiləsiz hərəkət edə biləcəklər.

Forum iştirakçıları üçün nəzərdə tutulan servis avtobusları 12 maydan fəaliyyətə başlayıb və 24 mayadək 24/7 rejimində işləyəcək. 25 mayda isə xidmət saat 18:00-dək davam edəcək.

Aşağıdakı marşrutlar üzrə xüsusi avtobuslar təşkil olunub:
A1 | 28 May
A2 | Nərimanov
A3 | İzmir
A4 | Şıx
A5 | İçərişəhər
A6 | Sea Breeze
Eyni zamanda “Airport Express” (H1 xətti) əvvəlki qaydada 28 May və Koroğlu metrostansiyaları ilə hava limanının Terminalları 1 və 2 arasında 24/7 rejimində fəaliyyətini davam etdirir.

Sərnişinlərə tövsiyə
Sərnişin axınının artacağı nəzərə alınaraq hava limanı uçuşdan ən azı 2–3 saat əvvəl gəlməyi və mümkün olduqda onlayn qeydiyyatdan istifadə etməyi tövsiyə edir.

Qeyd edək ki, BMT Dünya Şəhərsalma Forumu (WUF13) Bakıda beynəlxalq iştirakçıların geniş iştirakı ilə keçiriləcək və şəhər nəqliyyatı, şəhər planlaşdırılması və dayanıqlı inkişaf mövzularını əhatə edəcək.