Məhəmməd Şahbaz Şərif Azərbaycan Prezidenti İlham Əliyev ilə telefon danışığı aparıb.

Realmedia.info xəbər verir ki, bu barədə Azərbaycan Prezidentinin “X” sosial media hesabında məlumat yayılıb.

Telefon danışığı zamanı liderlər Azərbaycan ilə Pakistan arasında mövcud olan qardaşlıq və strateji tərəfdaşlıq münasibətlərini bir daha vurğulayıblar.

Tərəflər energetika, ticarət və xalqlararası əlaqələr də daxil olmaqla bir sıra sahələrdə əməkdaşlığın genişlənməsindən məmnunluqlarını ifadə ediblər.


Baş nazir Şahbaz Şərif Bakıda keçiriləcək Ümumdünya Şəhərsalma Forumunun sessiyasının əhəmiyyətini xüsusi qeyd edib və Azərbaycanın qlobal şəhərsalma gündəliyində mühüm rol oynadığını bildirib.

Prezident İlham Əliyev isə tədbirə göstərilən diqqətə görə təşəkkürünü çatdıraraq, Forumun beynəlxalq şəhərsalma platforması kimi əhəmiyyətini vurğulayıb.
Pakistanın Baş naziri vacib işləri ilə əlaqədar forumda iştirak edə bilməyəcəyini, lakin ölkəsinin tədbirdə yüksək səviyyədə təmsil olunacağını deyib.
Telefon danışığı zamanı regional məsələlər, xüsusilə Yaxın Şərqdə baş verən proseslər də müzakirə olunub.

Prezident İlham Əliyev Pakistanın tərəflər arasında atəşkəsin təmin olunması və gərginliyin azaldılması istiqamətində həyata keçirdiyi fəal vasitəçilik təşəbbüslərini yüksək qiymətləndirib və bunu Pakistan rəhbərliyinə beynəlxalq etimadın göstəricisi adlandırıb.
Söhbət zamanı liderlər gələcəkdə də sıx təmasların davam etdirilməsi barədə razılığa gəliblər.

Sonda Baş nazir Şahbaz Şərif Prezident İlham Əliyevi Pakistana rəsmi səfərə dəvət edib. Dövlət başçısı dəvəti məmnunluqla qəbul edib.