Türkiyədə keçirilən Antalya Diplomatiya Forumu çərçivəsində Azərbaycan, Türkiyə və Pakistan liderləri arasında mühüm görüş baş tutub.

Azərbaycan Respublikasının Prezidenti İlham Əliyev forum çərçivəsində Türkiyə Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərif ilə bir araya gəlib.

Görüş zamanı üç ölkə arasında mövcud olan strateji tərəfdaşlıq münasibətlərinin inkişaf perspektivləri müzakirə olunub. Liderlər siyasi, iqtisadi və təhlükəsizlik sahələrində əməkdaşlığın daha da genişləndirilməsinin vacibliyini vurğulayıblar.

Tərəflər beynəlxalq və regional məsələlərdə ortaq mövqedən çıxış etməyin əhəmiyyətini qeyd edərək, qarşılıqlı dəstəyin davam etdiriləcəyini bildiriblər. Xüsusilə enerji, nəqliyyat və logistika sahələrində birgə layihələrin həyata keçirilməsinin önəmi diqqətə çatdırılıb.

Qeyd edək ki, Azərbaycan, Türkiyə və Pakistan arasında münasibətlər son illərdə yüksələn xətt üzrə inkişaf edir və bu üçlük regionda mühüm siyasi platforma kimi çıxış edir.