Serbiya Prezidenti Aleksandar Vuçiç aprelin 19-da Azərbaycan Prezidenti İlham Əliyevlə telefon danışığı aparıb.

Azərbaycan Prezidentinin Mətbuat Xidmətinin yaydığı məlumata görə, söhbət zamanı İlham Əliyevin bu ilin fevralında Serbiyaya etdiyi rəsmi səfər məmnunluqla xatırlanıb. Həmin səfər çərçivəsində keçirilən Azərbaycan–Serbiya Strateji Tərəfdaşlıq Şurasının 1-ci iclası və imzalanmış sənədlərin ikitərəfli münasibətlərin inkişafı baxımından əhəmiyyəti vurğulanıb.

Tərəflər Azərbaycan və Serbiya arasında əlaqələrin daha da gücləndirilməsi, xüsusilə iqtisadi əməkdaşlığın genişləndirilməsi, enerji, investisiyalar və birgə layihələrin inkişafı məsələlərini müzakirə ediblər.

Aleksandar Vuçiç Serbiyaya göstərilən dəstəyə görə Prezident İlham Əliyevə təşəkkür edib və ölkəsinin Azərbaycanla münasibətləri dostluq, qarşılıqlı hörmət və əməkdaşlıq ruhunda inkişaf etdirməkdə maraqlı olduğunu bildirib.

Serbiya Prezidenti həmçinin gələn ay Bakıda keçiriləcək Ümumdünya Şəhərsalma Forumunun XIII sessiyasında iştirak edəcəyini təsdiqləyib.

Telefon danışığı zamanı “Air Serbia” şirkətinin mayın 3-dən Belqrad–Bakı birbaşa uçuşlarına başlayacağı məmnunluqla qeyd edilib. Bu addımın iki ölkə arasında əlaqələrin, turizm və iqtisadi əməkdaşlığın inkişafına töhfə verəcəyi vurğulanıb.

Dövlət başçıları həmçinin Yaxın Şərqdəki vəziyyətlə bağlı fikir mübadiləsi apararaq regionda sülh və sabitliyin bərpasının vacibliyini qeyd ediblər.