Aprelin 28-də Azərbaycanın müdafiə nazirinin müavini, Quru Qoşunların komandanı general-polkovnik Hikmət Mirzəyev ölkəmizdə səfərdə olan Türkiyə Silahlı Qüvvələrinin Quru Qoşunları komandanı ordu generalı Metin Tokelin rəhbərlik etdiyi nümayəndə heyəti ilə görüş keçirib.

Realmedia.info xəbər verir ki, bu barədə Müdafiə Nazirliyi məlumat yayıb.

Görüşdən əvvəl ümummilli lider Heydər Əliyevin büstü ziyarət olunub, önünə gül dəstəsi qoyulub, xatirəsi dərin hörmət və ehtiramla yad edilib. Ulu öndərin və Vətən uğrunda canlarından keçmiş şəhidlərin xatirəsi bir dəqiqəlik sükutla anılıb.

Daha sonra təntənəli qarşılanma mərasimi baş tutub. Komandanlar fəxri qarovul dəstəsinin önündən keçiblər, hər iki ölkənin dövlət himnləri səsləndirilib.

Görüş zamanı Azərbaycan ilə Türkiyə arasında hərbi sahədə əməkdaşlığın mövcud vəziyyəti və gələcəkdə daha da genişləndirilməsi istiqamətində ətraflı fikir mübadiləsi aparılıb.

Tərəflər iki qardaş ölkənin müvafiq qoşun növü mənsublarının peşəkarlığının, bilik və bacarıqlarının artırılmasında birgə və beynəlxalq təlimlərin əhəmiyyətini xüsusi vurğulayıblar.

Həmçinin qarşılıqlı maraq doğuran bir sıra digər məsələlər də müzakirə olunub.