Göyçay rayonunda baş verən ağır yol-nəqliyyat hadisəsində ölənlərin sayı iki nəfərə çatıb.

Realmedia.info xəbər verir ki, qəza Bakı-Şamaxı-Yevlax avtomobil yolunun Göyçay rayonunun Qarayazı kəndi ərazisindən keçən hissəsində qeydə alınıb. “Opel”, KIA və “Chevrolet” markalı avtomobillərin toqquşması nəticəsində iki nəfər həyatını itirib, bir neçə nəfər isə müxtəlif dərəcəli bədən xəsarətləri alıb.

Əldə olunan məlumata görə, hadisə zamanı 1970-ci il təvəllüdlü Hüseyn Salahov və 2012-ci il təvəllüdlü E.Feyzullayeva dünyasını dəyişiblər.

Qəza nəticəsində 1968-ci il təvəllüdlü İmran Əmrahov, 1964-cü il təvəllüdlü Mehriban Əmrahova, 1988-ci il təvəllüdlü Arzu Feyzullayeva və 2016-cı il təvəllüdlü L.Feyzullayeva xəsarət alaraq xəstəxanaya yerləşdiriliblər.

Tibbi Ərazi Bölmələrini İdarəetmə Birliyindən bildirilib ki, ümumilikdə 6 nəfər Göyçay Rayon Mərkəzi Xəstəxanasına hospitalizasiya olunub. Yaralılara müxtəlif travmalar və açıq sınıqlar diaqnozu qoyulub, onlara zəruri tibbi yardım göstərilib.

Daxili İşlər Nazirliyinin Mətbuat Xidmətindən bildirilib ki, faktla bağlı cinayət işi başlanılıb, araşdırmalar aparılır.