Konqo Demokratik Respublikasında mədən çökməsi böyük insan itkisi ilə nəticələnib. Yerli hakimiyyət orqanlarının və beynəlxalq mənbələrin məlumatına görə, ölkənin şərqində yerləşən Şimali Kivu vilayətində koltan hasilatı aparılan mədəndə baş verən çöküş nəticəsində 200-dən çox insan həyatını itirib.

Hadisə güclü yağışlardan sonra mədən ərazisində torpaq sürüşməsi nəticəsində baş verib. Dağıntılar altında qalanlar arasında mədən işçiləri ilə yanaşı, ərazidə olan mülki şəxslərin, o cümlədən qadın və uşaqların da olduğu bildirilir. Onlarla insan müxtəlif dərəcəli bədən xəsarətləri alıb.

Məlumata görə, sözügedən mədən qeyri-rəsmi şəkildə fəaliyyət göstərib və təhlükəsizlik qaydalarına tam əməl olunmayıb. Xilasedicilər çətin şəraitə baxmayaraq, dağıntılar altında qalan insanların axtarışını davam etdirirlər. Ölənlərin sayının artacağı istisna edilmir.

Qeyd edək ki, Konqonun şərq bölgələrində qeyri-qanuni mədənçilik geniş yayılıb və bu cür faciələr vaxtaşırı baş verir. Beynəlxalq təşkilatlar mədən sahəsində təhlükəsizlik tədbirlərinin gücləndirilməsi ilə bağlı dəfələrlə xəbərdarlıq edib.