Azərbaycan Milli Elmlər Akademiyasının Arxeologiya və Antropologiya İnstitutu tərəfindən Ağdərə və Ağdam rayonlarında arxeoloji qazıntı və monitorinqlər aparılıb.

Realmedia.info xəbər verir ki, tədqiqatlar Ağdərə rayonunun Canyataq kəndi yaxınlığındakı “Dəmirli” Filiz Emalı Kompleksi ərazisində və Ağdam rayonunun Göytəpə kəndində həyata keçirilib.

Məlumata görə, “Dəmirli” Filiz Emalı Kompleksində aparılan monitorinq zamanı neolit dövrünə aid qədim yaşayış yeri müəyyən edilib. Arxeoloqlar tərəfindən yoxlama qazıntıları zamanı zəngin saxsı nümunələri, osteoloji qalıqlar, iri daş alət fraqmentləri və oxra qırıntıları aşkar olunub.

Tədqiqatçılar hesab edirlər ki, Canyataq ərazisi qədim dövrdə oxra tədarükü ilə məşğul olan düşərgələrdən biri olub. Bildirilib ki, Qarabağın neolit dövrü sakinləri faydalı qazıntı yataqları barədə məlumatlı olublar və həmin resursların emalı ilə məşğul olublar.

Monitorinq zamanı ərazidə vaxtilə mövcud olmuş müsəlman qəbiristanlığının da dağıntılara məruz qaldığı müəyyənləşdirilib. Qeyd olunub ki, işğal dövründə erməni vandalları tərəfindən qəbiristanlığın yerləşdiyi təpənin bir hissəsi dağıdılıb və həmin ərazidə yol salınıb.

Ərazidə aparılan araşdırmalar nəticəsində XI-XV əsrlərə aid şirli və şirsiz keramika nümunələri, həmçinin orta əsrlərə aid tikili qalıqları aşkarlanıb. Kompleksin yaxınlığında isə üç kurqan qeydə alınıb.

Ağdam rayonunun Göytəpə kəndində aparılan monitorinq zamanı isə İlk Tunc dövrünə aid yaşayış məskəni tədqiq edilib. Mütəxəssislər müəyyən ediblər ki, ərazidə antik dövrə aid mədəni təbəqə də mövcuddur.

Bundan başqa, Eyvazxanbəyli kənd qəbiristanlığı ərazisində 1924-cü ilə aid altıguşəli türbə aşkarlanıb. Türbənin üzərindəki kitabəyə əsasən, burada Şamil bəy Salman bəy oğlu dəfn olunub. Arxeoloqlar onun Eyvazxanbəyli nəslinin son bəylərindən biri olduğunu ehtimal edirlər.

İnstitutdan bildirilib ki, aşkar olunan tarixi və arxeoloji nümunələr bölgənin qədim yaşayış və mədəniyyət tarixinin öyrənilməsi baxımından mühüm əhəmiyyət daşıyır.