Ədliyyə Nazirliyi məhkəmə-hüquq sisteminin müasirləşdirilməsi çərçivəsində məhkəmə ekspertizası sahəsinin inkişafına dair yeni konsepsiya təsdiqləyib.

Realmedia.info xəbər verir ki, “Azərbaycan Respublikasında məhkəmə ekspertizası sahəsinin inkişafına dair 2026–2030-cu illər üçün Konsepsiya” ekspertiza xidmətlərinin keyfiyyətinin artırılması, beynəlxalq standartlara uyğunlaşdırılması və institusional imkanların genişləndirilməsini nəzərdə tutur.

Sənədə əsasən, əsas yeniliklərdən biri özəl məhkəmə ekspertizası institutunun yaradılmasıdır. Bu mexanizm ekspertiza xidmətlərində alternativlik yaradacaq, işlərin daha operativ aparılmasına və məhkəmə proseslərinin sürətlənməsinə töhfə verəcək.

Qeyd olunub ki, özəl ekspertlərin fəaliyyəti dövlət ekspertləri ilə eyni hüquqi çərçivədə tənzimlənəcək və onların hüquq və vəzifələri bərabər olacaq. Bu yanaşma ekspert rəylərinin obyektivliyinin və qərəzsizliyinin təmin edilməsinə yönəlib.

Qanunvericiliyə əsasən, özəl məhkəmə eksperti olmaq istəyən şəxslər müvafiq ixtisas üzrə azı 10 illik iş təcrübəsinə malik olmalı və ya elmi dərəcə və beynəlxalq səviyyədə tanınmış sertifikatlarla xüsusi biliklərini təsdiqləməlidirlər.

Namizədlər üçün icbari təlimlər və müsahibə mərhələsi nəzərdə tutulur. Şəhadətnamə almış şəxslərin məlumatları isə Məhkəmə Ekspertləri Reyestrinə daxil ediləcək.

Bildirilib ki, vətəndaşlar və hüquqi şəxslər gələcəkdə həm dövlət, həm də özəl ekspertlərə müraciət edə biləcəklər. Xidmətlər müqavilə əsasında və sifarişçinin vəsaiti hesabına həyata keçiriləcək.

Nazirlikdən vurğulanıb ki, islahatların əsas məqsədi daha şəffaf, çevik və etibarlı məhkəmə ekspertizası sisteminin formalaşdırılması və vətəndaş məmnunluğunun artırılmasıdır.