10 mart 2026-cı il tarixində Milli Məclisin deputatı Azər Allahverənov Türk Dövlətləri üzv ölkələrinin QHT Platformasının Baş katibi kimi “Xocalı Soyqırımını Tanıtma” İctimai Birliyinin bir qrup nümayəndəsini qəbul edib.

Görüş zamanı ictimai birliyin sədri Şamil Ələkbərli təşkilatın fəaliyyəti haqqında məlumat verib. O bildirib ki, təşkilat 27 sentyabr 2007-ci ildə təsis olunub və həmin ilin 16 noyabr tarixində dövlət qeydiyyatına alınıb. Birliyin əsas məqsədi Xocalı soyqırımı həqiqətlərini dünya ictimaiyyətinə çatdırmaq və bu faciə haqqında beynəlxalq səviyyədə məlumatlandırma işini genişləndirməkdir.

Şamil Ələkbərli qeyd edib ki, əslən Salyan rayonundan olsa da, həyatının ən gənc illərini Xocalı şəhərində keçirib və baş verən hadisələrin bir çoxunun şahidi olub. Onun sözlərinə görə, həmin hadisələr bu gün ona Xocalı həqiqətlərinin daha geniş platformalarda tanıdılması istiqamətində fəaliyyət göstərmək məsuliyyəti yaradır.

Daha sonra ictimai birliyin İdarə Heyətinin üzvü Əziz İsmayılov çıxış edərək Azər Allahverənovu Türk Dövlətləri QHT Platformasının Baş katibi vəzifəsinə seçilməsi münasibətilə təbrik edib. O, beynəlxalq tədbirlər təşkil edilərkən “Xocalı Soyqırımını Tanıtma” İctimai Birliyinin nümayəndələrinin də iştirakına şərait yaradılması ilə bağlı xahişini diqqətə çatdırıb və təşkilata müxtəlif istiqamətlərdə dəstək göstərilməsinin vacibliyini vurğulayıb.

Birliyin İdarə Heyətinin digər üzvü Cavanşir Rzazadə isə çıxışında tarix boyu ermənilərin Azərbaycan xalqına qarşı törətdikləri qətliam və soyqırımı faktlarının dünya ictimaiyyətinə daha sistemli və məqsədyönlü şəkildə çatdırılmasının vacibliyini qeyd edib.

Görüşdə çıxış edən birliyin mətbuat katibi Mövsümağa Abasov da təşkilat nümayəndələrini qəbul edib dinlədiyi üçün Azər Allahverənova təşəkkürünü bildirib.

Qəbul zamanı deputatın köməkçisi Ülvi Məmmədəliyev də görüşdə iştirak edib. O, təşkilat nümayəndələrinə hörmətlə yanaşaraq səsləndirilən fikirləri diqqətlə dinləyib və bütün çıxışları qeydiyyata alıb.

Sonda Xocalı həqiqətlərinin beynəlxalq səviyyədə tanıdılması istiqamətində gələcək əməkdaşlıq imkanları barədə fikir mübadiləsi aparılıb.

Müəllif: Əziz İsmayılov
Mənbə: RealMedia.info