Azərbaycanın Baş naziri Əli Əsədov Türkiyə və Özbəkistanın futbol sahəsində əldə etdiyi uğurları yüksək qiymətləndirib.
Realmedia.info xəbər verir ki, Baş nazir bu fikirləri Türk Dövlətləri Təşkilatına üzv dövlətlərin hökumət başçılarının və vitse-prezidentlərinin “Gülüstan” sarayında keçirilən ikinci görüşündə səsləndirib.

Əli Əsədov bildirib ki, Türkiyə milli komandasının Kosovo üzərində qazandığı qələbə nəticəsində 24 ildən sonra yenidən dünya çempionatına vəsiqə qazanması böyük sevinc doğurub:

"Bu möhtəşəm qələbə hər birimiz üçün xüsusi sevinc mənbəyinə çevrildi. Bu tarixi hadisə münasibətilə qardaş Türkiyəni ürəkdən təbrik edirik."

Baş nazir əlavə edib ki, Özbəkistanın da tarixində ilk dəfə dünya çempionatına vəsiqə qazanması xüsusi qürur doğurur və bu uğur ötən ilin iyun ayında əldə olunub. Onun sözlərinə görə, hər iki nailiyyət bütövlükdə türk dünyasının zəfəri kimi qiymətləndirilməlidir.

Əsədov vurğulayıb ki, bu qələbələr türk xalqlarının müxtəlif sahələrdə yüksəlişini aydın şəkildə nümayiş etdirir.
Baş nazir, həmçinin Türkiyənin vitse-prezidenti Cevdet Yılmazı doğum günü münasibətilə təbrik edib və ona fəaliyyətində uğurlar arzulayıb.