FİFA İran milli futbol komandasının dünya çempionatındakı baza düşərgəsinin ABŞ-dən Meksikaya köçürülməsini təsdiqləyib.

Realmedia.info xəbər verir ki, bu barədə İran Futbol Federasiyasının prezidenti Mehdi Tac açıqlama verib. Məlumat “Reuters” agentliyinə istinadən yayılıb.

O bildirib ki, FIFA turnirdə iştirak edən bütün komandaların baza düşərgələrini təsdiqləyir və İran tərəfinin müraciətindən sonra komandanın yerləşdiyi məkanın dəyişdirilməsi qəbul edilib.

Yeni qərara əsasən, İran milli komandası Meksikanın Tixuana şəhərində, ABŞ sərhədinə yaxın bölgədə yerləşən düşərgədə məskunlaşacaq.

Qeyd edək ki, İran millisi qrup mərhələsinin bütün oyunlarını ABŞ ərazisində keçirəcək. Komanda Belçika, Misir və Yeni Zelandiya ilə eyni qrupda yer alıb.

Turnir 11 iyun – 19 iyul tarixlərində ABŞ, Meksika və Kanadada keçiriləcək və tarixdə ilk dəfə 48 komanda iştirak edəcək.