Bakıda yerləşən özəl xəstəxanalardan birində vəfat etdiyi bildirilən 9 aylıq körpə dəfn üçün Ağcabədi rayonuna aparılarkən ayılıb.
Realmedia.info xəbər verir ki, hadisə Ağcabədi rayonunun Yeni Qaradolaq kəndində qeydə alınıb. Kənd sakini İsgəndərli Elif Pərviz qızı əvvəlcə Ağcabədi Rayon Mərkəzi Xəstəxanasında müalicə alıb. Körpənin vəziyyəti ağırlaşdığı üçün Bakıya, özəl xəstəxanalardan birinə göndərildiyi bildirilir.
Məlumata görə, paytaxtdakı xəstəxanada həkimlər azyaşlının həyat əlamətlərinin olmadığını bildirərək, onun vəfat etdiyini qeyd ediblər və cəsədi ailəsinə təhvil veriblər.
Körpə dəfn olunmaq üçün Ağcabədiyə aparılarkən qəfil həyat əlamətləri göstərib və ayılıb. Hadisədən təxminən 3 saat sonra azyaşlı yenidən dünyasını dəyişib.
Faktla bağlı müvafiq qurumlar tərəfindən araşdırma aparıldığı bildirilir. Hadisənin təfərrüatları və ölümün dəqiq səbəbləri araşdırmanın nəticələrindən sonra məlum olacaq.