Salyan – Salyan rayonunda 11 yaşlı uşağın tibbi müdaxilə zamanı həyatını itirməsi ilə bağlı iddialar yayılıb.
Realmedia xəbər verir ki, hadisə rayonun 20 Yanvar küçəsində qeydə alınıb. İlkin məlumata görə, səhhətində problem yaranan uşaq erkən müayinədən sonra Salyan Rayon Mərkəzi Xəstəxanasına aparılıb. Xəstəxanada uşağa iynə vurulduqdan sonra onun vəziyyəti kəskin pisləşib və şok halı yaranıb.
Mərhumun anası Səadət Nəcəfova bildirib ki, övladı xəstəxanaya getmək istəməsə də, onu özü aparıb:
“Balamın başı gicəllənirdi. Təcili tibbi yardım çağırdım, gəlib apardılar. Dedilər sistem vuracağıq, düzələcək. Sonra dedilər ki, şəkəri var və iki-iki insulin vurdular. Balamı komaya saldılar, saat 4-ə qədər çabaladı.
Xəstəxanaya getmək istəmirdi, mən əlimlə apardım balamı. İki qaşıq bal yedizdirib aparmışdım. O balı etdilər şəkər xəstəliyi. Məni qorxudurlar ki, balanı yaracağıq, şikayətçi olma”.