Livan Prezidenti Cozef Aun İsrailə bir aylıq atəşkəs təklif edərək, bu müddət ərzində “Hizbullah” hərəkatının tərksilah edilməsinə nail olacağına söz verib.

Realmedia.info xəbər verir ki, bu barədə “Əşarq əl-Əvsət” qəzeti Beyrutdakı diplomatik mənbələrə istinadən məlumat yayıb.

Məlumata görə, dövlət başçısı sülh təklifini ABŞ-nin Livandakı səfiri Maykl İssa vasitəsilə İsrail tərəfinə çatdırıb. Aun bildirib ki, Livan ordusunun ölkədə fəaliyyət göstərən bütün qanunsuz silahlı qrupları tərksilah etməsi üçün təsdiqlənmiş planı tamamlaya bilməsi məqsədilə atəşkəsə ehtiyac var.

Prezident vurğulayıb ki, belə bir əməliyyatın aktiv hərbi toqquşmalar şəraitində həyata keçirilməsi mümkün deyil.
Qəzetin diplomatik mənbələrə istinadən verdiyi məlumata görə, Aun dövlətin silah üzərində inhisarının təmin olunmasının İsrailin quruda, havada və dənizdə hərbi fəaliyyətinin artması fonunda çətinləşdiyini bildirib.
Hazırda məsələ ilə bağlı İsrail tərəfinin rəsmi mövqeyi açıqlanmayıb.