Avropa İttifaqı (Aİ) ABŞ Prezidenti Donald Trampın Qrenlandiyanı ilhaq etmək planlarından imtina etməyəcəyi təqdirdə, Amerika şirkətlərinə qarşı sanksiyaların tətbiqi imkanlarını nəzərdən keçirir.
Realmedia “Report”a istinadən xəbər verir ki, bu barədə Britaniyanın həftəlik The Sunday Telegraph qəzeti mənbələrə istinadən məlumat yayıb.

Məlumata görə, mümkün məhdudlaşdırıcı tədbirlər ABŞ-ın texnologiya nəhəngləri — **“Meta”, “Google” və “Microsoft”**u hədəfə ala bilər. Eyni zamanda Brüsselin “X” sosial şəbəkəsinin fəaliyyətini məhdudlaşdırmaq, eləcə də ABŞ-də yerləşən banklara və maliyyə qurumlarına qarşı sanksiyalar tətbiq etmək variantları müzakirə olunur.

Qəzet yazır ki, Avropa ölkələrinin öz ərazilərində yerləşən Amerika hərbi bazalarının bağlanması ssenarisi də gündəmdədir. The Sunday Telegraph bu tədbirləri “həddindən artıq” adlandıraraq qeyd edib ki, əgər Tramp Böyük Britaniya və Aİ-nin aparıcı üzv dövlətlərinin Qrenlandiyaya NATO missiyası yerləşdirilməsi təklifini qəbul etməzsə, bu addımlar reallaşa bilər.

Xatırladaq ki, Donald Tramp dəfələrlə Qrenlandiyanın ABŞ üçün strateji əhəmiyyət daşıdığını bildirib. O, ilk prezidentliyi dövründə adanı satın almağı təklif edib və 2025-ci ilin mart ayında Qrenlandiyanın ABŞ-yə birləşdirilə biləcəyinə əminliyini ifadə edib. Danimarkanın Baş naziri Mette Frederiksen isə bu iddiaları qətiyyətlə rədd edərək, Qrenlandiyanın Danimarka Krallığının tərkib hissəsi olduğunu vurğulayıb.