Bakının tarixi memarlıq ansamblının qorunması önəmlidir və bu baxımdan yol-nəqliyyat sisteminin idarə edilməsi və mikromobilliyin inkişaf etdirilməsi, yəni ictimai nəqliyyata üstünlük verilməsi çıxış yolu ola bilər.
Bu sözləri Azərbaycan Prezidenti İlham Əliyev yanvarın 5-də yerli televiziya kanallarına müsahibəsində deyib.
Dövlət başçısı bildirib ki, Bakının yeni yol infrastrukturunun xəritəsi təsdiqlənib, 10 yeni metro stansiyasının yeri müəyyən olunub, əlavə iki depo tikiləcək. Mövcud metro stansiyalarında isə optimallaşma layihələri icra edilir. Prezident vurğulayıb ki, son 20 ildə yeddi metro stansiyası tikilib və əks halda hazırkı vəziyyət çətin olardı.
Eyni zamanda, mikromobillik, piyadalar üçün geniş məkanların yaradılması və bəzi küçələrin yalnız piyadalar üçün təşkili prosesi davam edir. Prezidentin sözlərinə görə, yaxın aylarda ictimaiyyət bu dəyişiklikləri görə biləcək. Bakıda yeni ictimai yerlərin yaradılması da sürətlə inkişaf etdirilir.