Azərbaycan Prezidenti İlham Əliyev yanvarın 5-də yerli televiziya kanallarına müsahibəsində son beş ildə ordu quruculuğu sahəsində görülən işlərdən danışıb.
Dövlətimizin başçısı bildirib ki, bu müddət ərzində ordu quruculuğu istiqamətində ardıcıl və fəal fəaliyyət göstərilib, əldə olunan uğurlar isə heç vaxt arxayınlıq üçün əsas olmayıb.
“Bu beş il ərzində biz ordu quruculuğu ilə fəal şəkildə məşğul olmuşuq və necə deyərlər, qazandığımız uğurlardan arxayınlaşmamışıq”, – deyə Prezident vurğulayıb.
İlham Əliyev qeyd edib ki, İkinci Qarabağ müharibəsində əldə olunan şanlı Zəfər Azərbaycanın güclü tərəflərini nümayiş etdirməklə yanaşı, idarəetmənin və müxtəlif sahələrin daha da təkmilləşdirilməsinin vacibliyini də ortaya qoyub.
“Xüsusilə İkinci Qarabağ müharibəsi həm güclü tərəflərimizi, həm də daha yaxşı nəticələr əldə etmək, o cümlədən idarəetməni təkmilləşdirmək üçün fəal şəkildə işləməli olduğumuz sahələri açıq şəkildə nümayiş etdirdi. Çünki hətta Zəfərlə nəticələnsə və bizimki kimi müzəffər olsa belə, hər bir müharibə nəticə çıxarmaq üçün əvəzsiz təcrübədir. Mən məhz bunu əsas götürdüm”, – deyə dövlət başçısı əlavə edib.
Prezident İlham Əliyevin sözlərinə görə, qarşıdakı dövrdə də Azərbaycanın müdafiə qabiliyyətinin gücləndirilməsi və Silahlı Qüvvələrin daha da modernləşdirilməsi əsas prioritetlərdən biri olacaq.